睇牙醫：識人好過識字

關於阿女睇牙醫，呢一個長篇大論嘅故事，簡直可以講10日10夜。小朋友要睇牙醫，係一件令媽媽大傷腦筋嘅事情。坦白講，牙醫依家野，真係識人好過識字。
亞女響四歲幾嘅時候，發現有蛀牙出現，當時就去咗睇一些連鎖式嘅牙醫診所。牙醫先幫佢洗牙，然後就同我講佢有蛀牙，不過因為年紀太細唔可以做麻醉，就俾咗藥丸佢食，嗰粒係麻醉嘅藥丸，Q媽當時亦比較天真，因為我一心相信，牙醫比嘅建議應該係冇錯，咁我就俾亞女食個粒藥丸，食完之後，亞女就開始又好眼瞓嘅感覺，坦白講我覺得佢真係有少少似啪咗丸嘅感覺。
可能就喺要佢進入呢一個稱為被麻醉嘅狀態下剝牙最好。響佢極力掙扎嘅情況底下，好勉強咁樣進行左呢一個剝牙過程，沒有最恐怖，只有更恐怖。牙醫係呢個時候同我講，其實亞女都仲有其他蛀牙，最好嘅方法係做一個全身麻醉，可以幫佢洗乾淨啲牙，同埋清理埋蛀牙。
響呢個時候我個心都震埋出般，原因係因為我諗緊四歲幾，需要全身麻醉? 
第二個原因，當然係聽到嗰個價錢，牙醫開價四萬幾，全身麻醉剝牙，響嗰個時候我個心諗，乜我個樣真係似咁有錢咩? 今次我冇咁順攤啦，由於牽涉到四萬幾蚊，同埋全身麻醉呢一個問題，都係大單野黎，所以我覺得要從長計議，開始攝高枕頭諗清楚，究竟我有咩朋友係一個牙醫?? 或者佢有機會識一啲好嘅牙醫。
有時我諗，我唔係需要搵全港技術最好嘅牙醫，我只係需要有個人，真心咁樣講俾我聽而家個情況係點? 我有咩方法可以選擇，已經足夠！話雖如此簡單，好多時真係好難搵呢一個人出嚟。
感謝天父爸爸，當我認真思考嘅時候，轉接之間，朋友介紹了一個好有心嘅牙醫，又要介紹一下俾大家認識，Dr Norman Wong.
轉眼之間睇咗王醫生已經有六年時間，診所唔需要富麗豪華，不過大部份嘅哥哥姐姐都係好有愛心，第一次見王醫生我有啲驚訝，因為見佢嘅制服係印有巴斯光年。應該咁講，佢係一個著住巴斯光年制服嘅叔叔，不過呢個叔叔好有笑容，好開心，我記得我同佢講囡囡情況，出邊有牙醫需要四萬幾蚊做全身麻醉剝牙，所以我好擔心。當時王醫生笑左一下，佢只係回應：冇咁誇張。定期半年去一次洗牙就可以啦。
診所有一個傳統，都幾有趣，就係每次小朋友睇完牙嘅時候，姐姐會幫佢影一張相。嗰張相當你下次去嘅時候，姐姐會俾返您以作留念，我好欣賞呢個窩心嘅動作，雖然佢哋做嘅嘢只係好少，但係對於爸爸媽媽小朋友來講，就係一個好好嘅留念。

*圖中係每次洗牙都有姐姐或者哥哥教佢點護理牙齒