Sorry, you need to enable JavaScript to visit this website.
移至主內容

Q媽突破了盲腸

人生樓樓長,總會唔小心做左d好瘀皮嘅野,只不過係我人生入邊,瘀皮嘅事特別多。
話說最近喺面書見到一個舊朋友,佢分享囡囡唔舒服入院嘅經歷,因為一路個肚都痛,位置又響盲腸附近,所以決定入醫院,詳細檢查清楚已策安全同埋安心。我有理由相信,呢件事已經進入我嘅潛意識,相隔不到兩星期,返工嘅時候收到姐姐電話,已經有少少不祥嘅預感,點知電話接通之後,就話阿女今朝起身個肚很痛,搞到我都火速飛奔返屋企,返屋企見到亞女嘅時候,佢撳住個肚位置叫痛。
而我,即刻上晒身咁,撳佢肚仔一個位置,然後放手,點知佢嘅反應完全跟足劇本,佢話放手嘅時候痛!根據我睇咁多醫劇嘅經驗,心裏面諗:死火!呢個咪即係盲腸炎嘅症狀? 
緊急機制立即啟動,先給爸爸一個電話,雖然佢嘅建議係等多幾小時,再去診所睇家庭醫生先,因為未必係盲腸炎。唔知點解,完全唔理佢嘅建議,嗰時好似鬼上身咁,我覺得需要分秒必爭,然後立即搭的士去咗醫院睇門診,搵一個相熟嘅兒科醫生。
講到呢度需要暫停一下,介紹一個非常之細心嘅兒科醫生: Daniel Ting。
 

Dr. Ting檢查之後,位置及症狀的而且確同盲腸炎非常相似,重申一次,由於潛意識入血嘅我,心裏焦急如同火燒,所以決定即時入院檢查,是否真的盲腸炎? 如果真係出現嘅話,就要進行手術。
當阿女聽到「手術」呢兩個字,雖然我唔明佢點解好似聽得明咁,佢都表現到好緊張,不過外表依然扮到好鎮定!
就響醫院瞓咗一晚,經過左幾個唔同嘅測試檢定,亞女嘅冷靜都嚇左我一跳,今次真係比阿女條腸激死,好彩咁講,佢唔係盲腸炎,只係佢條腸入邊有細菌,而細菌出現嘅位置正正係盲腸炎嘅位置,所以又痛又發燒。
Q媽實在太多瘀皮嘅事發生,實在係要多多分享比大家知,夜晚嘅時候,我同阿女講:真係對唔住,搞到你要拮針咁辛苦,點知佢神回應同我講,其實都係媽媽擔心我姐,嗰個時候突然發現,點解佢大個左咁多? 
做媽媽嘅,好多時心入邊都會緊張,不過今次我學識一樣野,真係幾緊張都要比自己冷靜一下,聽一聽身邊可信嘅意見。原來身邊發生嘅事係會無形中就會變成左自己嘅擔心,好驚嗰啲成為事實,所以講到尾,要繼續學習做一個冷靜嘅媽媽。