快快樂樂做facial

新春團拜,一年一次,相識幾十年嘅豬朋狗友一聚。
吹水、食糕再吹水,今年有同行吹到有關公司剛發加人工信,原來非正式統計,無論老闆們幾精心設計每年點樣做facial (即Appraisal)嘅流程,以佢地非專業性分析,90%同事都係諗緊:咪鬼搞咁多野啦唔該,直接比我知您加我幾多就得! 
原來有公司會要求主管同下屬務必對面談20-30分鐘,當中亦有指定問題要問。填完左10萬8千7份表之後,仿佛仲要拎去美國太空總署做分析咁,最後先出結果。
其實今時今日嘅打工仔不知幾醒,跟邊種腦細,腦細咩性格一早瞭如指掌,如果係一個正正常常嘅腦細,會唔會等一年先同您講一次您咩表現? 好好醜醜平日都同您講左啦,要讚要鬧您都心中有數。
雖然聽見佢地呻到樹葉都落,打工仔,得閒聚下呻下又八下,呢種都係人生一種動力,祝賀大家豬年都快快樂樂!

 

 

 

About the Author