自然養生 – 我和大腸有個約會

識左四分一世紀的老友，昨晚打電話來，話要嚮應譚校長號召，要做一件轟烈的事，下星期去照腸。
 
為慶祝踏入人生下半場，我在2年前已身先事卒，預備了照腸作為生日禮物，一於當自己買左個2日1夜酒店套票入醫院過一晚夜。講真，私家醫院張床位分分鐘貴過深圳珠海5星酒店房價。
 
去旅行要做足準備，為左這個照腸之旅，我都做好心理生理準備，因此過程極度順利而愉快，更因為我的高度推介，結果2年間感染了身邊朋友一個個去照腸。
 
一般人聽到照腸，除非殺到埋身，被醫生勒令去做，否則自願性而開開心心完成此項工程，必須要如我等有極佳的自娛指數。
 
首先我認為照一次腸，可以換來十年八載的安心，非常值得，等同今日老師叫你交一份考試功課，交左又合格過關，跟著十年內不用再去考試，你說這個十年安心投資多有效益。
 
照腸過程辛苦嗎? 如果對一個極度不喜歡飲水的人或者覺得是一個挑戰，按遊戲規則，要求照腸健兒在2小時內飲完2公升瀉水，對水杯不離手的我，是等閑事。至於瀉水味道? 原來消費者有權揀，同醫生講要似保曠力味道那款，各位，這是經驗之談的過來人心得兼私人醒貼士。
 
飲瀉水為的是要令條腸清得一乾二淨，使醫生睇得一清二楚。照腸前醫生例必叫大家早三兩天前要開始戒食蔬菜、水果，麥皮，五穀…一切高讖食物，對於我等六十後自命健康者, 要求幾天禁食蔬菜、禁吃生果、一時間有點為難，但別當醫生說話耳邊風，我有一位堅持原則，依然故我的好姐妹，結果成為我認識的朋友中，創出與洗手間馬桶糾纏時間最長的紀錄。

又有另一位饞嘴的朋友，臨入院前仍堅持食一碟乳豬飯作最後晚餐，結果瀉水混合豬油，難為厠所清潔嬸嬸!
 
要令照腸過程不苦悶，有朋友試過約同三兩知己一同入院，住同一病房，鬥快飲瀉水，輪流搶住入廁所，屙完又來傾過，一晚好快過。
 
進入人生下半場，健康肯定是最無價，能夠預防總好過問題發生，把你殺個措手不及，眼見身邊仍有朋友話忙，話無時間，不去驗身，不花心思留意自己身體變化，真想同大家講，為你所愛的人，請先好好愛自己的身體。
 
<杜淑貞撰文之自然養生系列>