自然養生 - 非一般嘅紅色 - 多功能紅菜頭

上次講左奇異果連皮食嘅好處，係咪真係work?試下你便知，保証不會飲到成口臭! 奇異果維他命豐富，但在中醫養生角度，怕寒涼嘅女士不宜多吃。因此我今次介紹啱哂女士，仲可以煲湯、做沙律、生食、榨果汁嘅紅菜頭。紅菜頭在歐洲飲食文化中流行已久，我地成日飲嘅羅宋湯，就係加左紅菜頭啦。 近年香港人亦開始吹捧，因為佢抗氧化抗衰老效果No.1，而且係高鉀、高鈣、高葉酸、高鐵質，總之好處多到嚇親人。 食紅菜頭原來連葉、莖一齊食仲有益。我就試過用黎打汁，有少許苦澀味和草青味，所以不妨加蘿蔔、蔬果一齊打，口感好好多。但留意，小便會變成微紅色，此乃正常現象。 除左街市，喺一啲日式或大型洋化超市，有一款由澳州入口嘅有機紅菜頭，一包有5至6個，去了皮，拳頭般大小，價錢不超過$50，同新鮮嘅價錢相約，但勝在乾手淨腳。買返屋企後，逐個用保鮮紙包好，放入雪格，要用就取出一個解凍。早上飲一杯，感覺整個腸胃都有一股田園味。但提醒大家，紅菜頭糖份都幾高，建議配西芹、紅蘿蔔，甚至加點檸檬汁，就係一杯纖維豐富嘅自家製蔬菜汁。