2h StartUp:Eddy Story

人物專訪:七百萬人的故事Eddy

知道大家習慣左睇片,鼓勵您今日用幾分鐘感受一下呢篇人物專訪。

主角:Eddy

年齡:65+

Eddy有四兄弟姊妹,由於佢係大哥,所以由十四歲已經開始出黎打工。冇錯,想當年十四歲會有人請,Eddy讀書只係到四年級,可以做咩? 由茶記洗碗開始,由於手腳快,洗碗之後就幫忙送外賣,除左茶記,當然都有做酒樓賣點心,兩年過後…偶然機會來臨,到半島酒店做Office Boy,再調職去餐飲部,之後四年分別都在比較有名的酒店工作。由於工作上通常面對外國客人,除了在工作上實操英語,Eddy仲會抽時間到英專上堂。

踏入二十歲,人生又有新嘗試,到了當年『東方女皇』郵輪工作,年紀輕輕的Eddy已成為Captain,回想起在郵輪工作期間認真大開眼界。可能係同飲食業有緣份,輾轉數年後在HK Club工作,由waiter開始做到Assistant Manager, 台前幕後一腳踢,一過就廿三年了! 

就咁happily ever after? NO way! Eddy話安穩左廿三個年頭,後生仔點都想試下做老闆,攞住二百幾萬做左咩? 開左一間西餐廳、投資下(即係炒樓炒下股票),講到呢到,大家都知道咩事發生啦! 隨之而來係金融風暴再加沙士,Eddy由老闆轉身一變,做回waiter,返工、還債、再返工,神推鬼㧬之下考左一個保安牌照,本來打算傍下身,就響呢個時候見到有間公司請保安員,可以返五日工,就轉左行了。

三年多前,公司有一個新保安員返工,笑容滿面,何解佢會令我印象深刻? 因為不停有客人及同事讚賞呢位保安叔叔,真心待人亦十分有禮。就響佢做左三個月保安工作後,我忍唔住同佢傾左好耐,其實好想了解佢多D,之後做左個大膽嘅決定,問佢:您想唔想試下做公司嘅reception? 就係咁…Eddy就做左我地全能reception啦,同事亦不時聽到Eddy流利嘅英文同國語。

 

後記:

我:Eddy, 您見識咁多,有咩想分享比家下嘅打工仔聽呀?

E:返工其實最緊要開心,唔開心咪仲慘過坐監? 仲要唔怕蝕底先得架,肯蝕底先學到野架!

 

傾談過程中,知道原來多年前Eddy已有四萬多月入,公司仲出十四個月糧比佢,高高低低都經歷過,做完waiter做老闆再做waiter,面前嘅Eddy彬彬有禮,態度謙虛,佢話做人做事:真心待人,盡力做好就夠。

 

Eddy 2nd Half語錄:

要盡情享受人生下半場,活在當下,凡事感恩同珍惜,身處咩環境都唔好抱怨就掂晒!

About the Author