Sorry, you need to enable JavaScript to visit this website.
移至主內容

2h StartUp – Candy

2h StartUp – Candy
幾年前認識了Candy,典型Mall姐,講過算數加上執行力其高,做人充分利用所有時間,放工之後再進修,要不停upgrade自己,所有事情都講求效率,直到一年前嘅平安夜…確診三期乳癌。

從果一刻開始,生命就進入左極度矛盾嘅狀態:一方面就好理性咁不停上網睇晒所有同乳癌有關資料,連人地醫學報告都研究埋,再去睇唔同嘅醫生。另一方面,發現心裡從未如此恐懼過,既不安又無助,每次見醫生時淚水完全控制唔住,其間有醫生建議佢去睇埋心理科。所有嘅事都響好短時間之內發生,要做決定,做手術先? 定做化療先? 手術用咩方法做係最好? 唔同醫生有唔一樣嘅講法,再加埋親朋戚友嘅睇法,心裡亂上加亂。

一年後嘅今日,手術及所有療程已經順利完成,安靜落黎回想一下整件事,Candy媽眼有淚光咁分享其中有2幕最感動嘅情節:

1) 平安夜,心裡極度唔平安,突然聽到屋企樓下有人唱詩歌,一向信自己嘅佢,竟然落左樓向素未謀面嘅人傾訴仲祈禱添。

2) 去到唔同嘅醫院,見過無數醫生,坦白講以Candy媽咁波動嘅情緒未必個個醫生都會頂得住,只有一次,一位播道醫院嘅醫生講左一番說話…
醫生:我細細個成日帶我妹妹過關返大陸,次次過關佢都喊,因為太多人好亂佢會驚;不過Candy您唔駛驚,今次我都會一樣叫您唔駛喊,因為我會拖實您一齊去過呢一關!

響一個人最不安嘅時候,有時只係需要有人陪住,一齊面對難關。Candy媽對姊妹們有以下嘅叮囑:
-          每年一定要做婦科檢查,唔好再比忙做藉口
-          呢個話題係關於我地嘅健康,要正視,唔需要怕醜

今日面前嘅Candy媽依然自信,見到佢心裡面充滿平安,今次乳癌後,考左個保險牌照,因為佢知好多人去到果一刻都好徬徨,唔知邊份保險claim到? Claim唔到? 好想可以幫到人,另外佢家下好努力研究養生、健康嘅課題,仲笑笑口咁話:上半生唔養生,下半生睇醫生。Candy媽,我想同您講:您好勇敢好靚女,由個心靚出黎呀!

Candy媽2H Start Up語錄:下半場冇人知幾時開始,不過唔好一直忙,忙到錯過左人生最重要嘅野,發生每件事都有原因嘅,實會有出路,唔好過份擔心!

#乳癌 #2hStartUp
有關資訊:
乳癌多面睇:http://bit.ly/2ylc99j
免費乳健檢查計劃:http://bit.ly/2f6MOaD