Q版生活 – 打13價，有如睇樓價

個多月前，人心惶惶，做媽媽的周圍撲13價疫苗，我亦跟大隊打左去某診所登記，只是排隊登記，姑娘話疫苗未返。
 
某日，收到診所電話，姑娘說：疫苗返左，連醫生診金$1490，您幾時帶小朋友黎打?
 
那刻心情彷彿聽到她說，您幾時帶小朋友一齊黎俾我地打…劫?
 
我拒絕了，太貴，唔捨得。
 
之後有家長跟我說，有另一個醫生收費$850，不過都要排隊，我又打了去排，至今，一直未收過電話了。
 
幾星期後，囡囡發燒去睇醫生，竟然見到大大隻字寫住『有關13價可在這裡登記』，有如大鄉里一般的我上前問姑娘，我想登記! 姑娘有禮地回應，不用登記了，您等囡囡好返隨時帶佢過黎打，我忍不住問她，請問大約幾錢? 她回答：100蚊。
 
我真的以為聽錯，接連whatsapp 家長組群，竟然有另一位媽媽回應，昨天才帶兒子去另一診所，成為$50大元。
 
低處未算低，回想一下都笑了出來，香港真是一個有趣地方。
 
<曾子怡撰文之Q版生活系列>